CAPÍTULO III. REPRESENTACIÓN DAS PARTES NEGOCIADORAS.

ARTIGO 7. COMISIÓN PARITARIA. Acórdase establecer unha Comisión Paritaria como órgano para a conciliación, interpretación e vixiancia do pactado no presente Convenio.

Esta Comisión estará formada por catro representantes da Asociación de Asesores e Xestores da provincia de Lugo; dous de CIG.; un de UGT e unde CC.OO., organizacións que figuran como asinantes do presente convenio.

Ós sós efectos de notificacións, sinálanse os seguintes enderezos:

Pola representación económica: Asociación de Asesores e Xestores da provincia de Lugo, situada na Praza de Sto. Domingo, 6 8, 20 de Lugo.

Pola representación social: Confederación Intersindical Galega (CIG), na Ronda da Muralla, 58, baixo dereita de Lugo; UGT na Ronda da Muralla, 58, 1º de Lugo e Comisións Obreiras, na Ronda da Muralla, 58, 4º de Lugo.

CAPÍTULO IV. TEMPO DE TRABALLO.

ARTIGO 8. XORNADA DE TRABALLO. A xornada de traballo distribuirase da seguinte forma:

a) Xornada de inverno: 40 horas efectivas semanais, traballadas de luns a venres, en réxime de xornada partida.

Aquelas empresas que teñan establecida xornada continuada durante todo o ano, respectarana como condición máis beneficiosa, distribuíndoa de luns a sábado.

b) Xornada de verán: 35 horas efectivas semanais, traballadas de luns a venres, en réxime de xornada intensiva ou continuada. Este réxime de xornada levarase a cabo desde o día 1 de xullo ó día 30 de setembro, ámbolos dous inclusive, agás as Asesorías Contables e Fiscais, que poderán optar, en base ás obrigas do calendario fiscal, polo periodo comprendido desde o 20 de xullo ó 12 de outubro.

Os días 24 e 31 de decembro considéranse con carácter xeral como días non laborables. No caso de que os traballadores e traballadoras teñan que prestar servizos nas datas sinaladas por razóns organizativas ou de necesidade de atención ou asistencia ó público, as empresas terán que sustituír o disfrute do descanso na datas sinaladas por outro tempo de descanso equivalente.

ARTIGO 9. PERMISOS RETRIBUÍDOS. Ós traballadores e traballadoras interesados concederáselles  necesariamente  os seguintes permisos retribuídos:

a) Matrimonio do traballador ou traballadora: 15 días.

b) Matrimonio de ascendentes, descendentes e colaterais ata o terceiro grao de consanguinidade e afinidade: o día no que se celebre a cerimonia.

c) Por nacemento de fillo: 3 días.

d) Intervención cirúrxica ou enfermidade grave de cónxuxe e parentes de primeiro grao por consanguinidade ou afinidade: 5 días.

e) Morte do cónxuxe, parentes de primeiro grao por consanguinidade ou afinidade e irmáns: 4 días, que se ampliarán ata 5 días se o óbito ocorrera en provincia distinta á do centro de traballo.

f) Morte de parentes de segundo grao por consanguinidade ou afinidade: 2 días. No caso de tíos, 1 día; 2 se é fora da provincia.

g) Necesidade de atender asuntos propios que non admitan demora: ata un máximo de 3 días non acumulables a vacacións. Outorgarase este permiso unha vez demostrada a súa necesidade.

h) Licencia a Representantes Sindicais: estarase ó lexislado nesta materia.

i) O tempo necesario para a realización de exames en centros oficiais.

j) Para a mudanza por cambio de domicilio, 2 días.

k) Polo tempo necesario para asistencia a consulta do médico de cabeceira da Seguridade Social e asistencia a consulta médica de especialista da Seguridade Social, en ambos casos coincidindo o horario de consulta co de traballo e debendo presentar o traballador ou traballadora o volante xustificativo.

l) Polo tempo necesario para acompañamento a consulta do médico de cabeceira da Seguridade Social e asistencia a consulta médica de especialista da Seguridade Social de fillos menores de 6 anos e ascendentes maiores de 65 a cargo do traballador ou traballadora, entendéndose por tales os que convivan con él, en ambos casos coincidindo o horario de consulta co de traballo e debendo presentar o traballador ou traballadora o volante xustificativo.

m) Por lactancia dun fillo menor de nove meses, unha hora de ausencia do traballo que o traballador ou traballadora poderá dividir en duas fraccións ou a unha reducción da súa xornada en media hora ca mesma finalidade.

Os días ós que fai referencia este artigo entenderanse, en todo caso, como naturais e sen perxuízo do establecido no Estatuto dos Traballadores.

Ós efectos previstos neste artigo, as referencias feitas ó cónxuxe entenderanse feitas á parella de feito que conviva co traballador ou traballadora sempre que estea debidamente inscrita no rexistro de parellas de feito do concello correspondente.

ARTIGO 10. VACACIÓNS ANUAIS. O persoal regulado por este convenio terá dereito a 30 días naturais de vacacións anuais que se disfrutarán preferentemente nos meses de verán, de acordo coas necesidades da Empresa.

As quendas de vacacións serán fixadas pola Empresa e os Delegados de Persoal ou Comités de Empresa  onde os haxa  ou, no seu defecto, por quen designen os traballadores e traballadoras.

A data de comezo do disfrute farase coincidir cun luns laborable, agás cando se trate dun mes natural.

CAPÍTULO V. PERCEPCIÓNS ECONÓMICAS .

ARTIGO 11. SALARIO BASE. Tómase como punto de partida ós efectos de aplica-los incrementos salariais pactados para o presente Convenio a Táboa Salarial revisada do ano 2000 que se adxunta ó presente texto como Anexo I, resultado de aplicar, sobre as táboas do ano 1999, un incremento dun 4,5%.

2001.- Os salarios estabrecidos para as distintas categorías para o período que vai dende o 1 de xaneiro de 2001 ó 31 de decembro de 2001 serán os recollidos na Táboa Salarial que se adxunta como Anexo II, o que supón un incremento con respecto ás táboas do ano 2000 dun 2,7%.

2002.- Os salarios estabrecidos para as distintas categorías para o período que vai dende o 1 de xaneiro de 2002 ó 31 de decembro de 2002 serán os recollidos na Táboa Salarial que se adxunta como Anexo III, o que supón un incremento con respecto ás táboas do ano 2001 dun 4%.

2003.- Os salarios estabrecidos para as distintas categorías para o período que vai dende o 1 de xaneiro de 2003 ó 31 de decembro de 2003 serán os recollidos na Táboa Salarial que se adxunta como Anexo IV, o que supón un incremento con respecto ás táboas do ano 2002 dun 2,6%.

2004.- Os salarios estabrecidos para as distintas categorías para o período que vai dende o 1 de xaneiro de 2004 ó 31 de decembro de 2004 serán os recollidos na Táboa Salarial que se adxunta como Anexo V, o que supón un incremento con respecto ás táboas do ano 2003 dun 3,2%.

2005.- Os salarios estabrecidos para as distintas categorías para o período que vai dende o 1 de xaneiro de 2005 ó 31 de decembro de 2005 serán os recollidos na Táboa Salarial que se adxunta como Anexo VI, o que supón un incremento con respecto ás tábaas do ano 2004 dun 2,5%.

Estabrécese para o ano 2005 unha cláusula de revisión para o suposto de que o IPC real estatal do ano 2005 supere o 2%, no exceso desta cifra e con efectos retroactivos dende o 1 de xaneiro de 2005.

2006.- Os salarios establecidos para as distintas categorías para o período que vai dende o 1 de xaneiro de 2006 ó 31 de decembro de 2006 serán o resultado de aplicar, sobre as táboas do ano 2005, o incremento salarial consistente no IPC previsto polo Goberno para o ano 2006 mais 1 punto.

Estabrécese para o ano 2006 unha cláusula de revisión para o suposto de que o IPC real estatal do ano 2006 supere o IPC previsto polo Goberno para o mesmo ano, no exceso desta cifra e con efectos retroactivos dende o 1 de xaneiro de 2006.

2007.- Os salarios establecidos para as distintas categorías para o período que vai dende o 1 de xaneiro de 2007 ó 31 de decembro de 2007 serán o resultado de aplicar, sobre as táboas do ano 2006, o incremento salarial consistente no IPC previsto polo Goberno para o ano 2007 mais 1 punto.

Estabrécese para o ano 2007 unha cláusula de revisión para o suposto de que o IPC real estatal do ano 2007 supere o IPC previsto polo Goberno para o mesmo ano, no exceso desta cifra e con efectos retroactivos dende o 1 de xaneiro de 2007.

Abono de atrasos.- Para o abono dos atrasos correspondentes ós que haxa lugar como consecuencia da pubricación do presente Convenio estabrécense os seguintes prazos:

• Tres meses dende a firma do presente Convenio para o abono dos atrasos correspondentes ós anos 2001 e 2002, así como, no seu caso, dos atrasos correspondentes á revisión das táboas salariais do ano 2000.

• Seis meses dende a firma do presente Convenio para o abono dos atrasos correspondentes ós anos 2003, 2004 e ás mensualidades do ano 2005 ata a pubricación do presente Convenio no Boletín Oficial da Provincia de Lugo ou Diario Oficial de Galicia.

ARTIGO 12. REMUNERACIÓN ANUAL. En cumprimento do que dispón o artigo 26.5 do vixente Estatuto dos Traballadores detállanse na segunda columna das Táboas Salariais anexas os salarios no seu cómputo anual, en función da xornada efectiva pactada no presente Convenio.

ARTIGO 13. ANTIGÜIDADE. Establécese un complemento persoal de antigüidade para tódalas categorías, consistente en TRIENIOS por un importe do 6% do salario base, a devengar desde o día primeiro de mes no que se cumpra o trienio.

En todo caso, seguiranse percibindo as cantidades que se tiveran devengadas en concepto de antigüidade á data de entrada en vigor deste convenio.

A acumulación dos incrementos por antigüedade non poderán, en caso ningún, supoñer máis do 60%.

ARTIGO 14. GRATIFICACIÓNS EXTRAORDINARIAS E PARTICIPACIÓN EN BENEFICIOS. Os traballadores e traballadoras ó servicio das empresas afectadas polo presente Convenio, percibirán tres gratificacións extraordinarias cada ano: unha no mes de xullo, outra no mes de setembro, e a terceira no mes de decembro. O importe de cada unha delas será dunha mensualidade de salario base máis antigüidade.

Así mesmo, e en concepto de participación en beneficios, os traballadores e traballadoras percibirán unha paga máis no mes de marzo de cada ano, calculada de igual forma que as anteriores.

O persoal que ingrese ou cese na Empresa durante o transcurso do ano, percibirá as gratificacións extraordinarias e a participación de beneficios en proporción ó tempo traballado.

Aqueles traballadores ou traballadoras que polos conceptos anteriores veñan percibindo das empresas o importe correspondente a unha mensualidade do seu salario real, seguirán excepcionalmente coas mesmas condicións por ter carácter máis beneficioso.

As pagas correspondentes ós meses de marzo e setembro poderán ratearse ó longo do ano á decisión das empresas.

CAPÍTULO VI. CONCEPTOS EXTRASALARIAIS.

ARTIGO 15. AXUDAS DE CUSTO E DESPRAZAMENTOS. Todo traballador ou traballadora con dereito a axuda de custo por ter que efectuar saídas con motivo do traballo fóra do concello no que radique o centro de traballo percibirá, a partires da publicación do presente Convenio no Boletín Oficial da Provincia de Lugo ou Diario Oficial de Galicia, á elección da empresa, e previa comunicación ó traballador do sistema a seguir, ou ben gastos a justificar ou ben as contías que figuran a continuación:

• Comidas: 15 euros/xantar ou cea.

• Pernocta: 30 euros/noite.

ARTIGO 16. PLUS DE TRANSPORTE. Establécese para tódalas categorías profesionais un plus de transporte por mes efectivamente traballado nas seguintes contías:

2001.- 33,95 euros/mes

2002.- 35,31 euros/mes

2003.- 36,23 euros/mes

2004.- 37,39 euros/mes

2005.- 38,32 euros/mes

Para os anos 2006 e 2007 a contía do plus de transporte será o resultado de aplicar, sobre o importe do plus do ano anterior, os incrementos pactados no artigo 11 do presente Convenio.

ARTIGO 17. GASTOS DE LOCOMOCIÓN OU QUILOMETRAXE. O traballador ou traballadora que, por necesidades do servicio, teña que desprazarse fóra do lugar onde radique o seu centro de traballo empregando o seu vehículo particular, percibirá por este concepto a partires da publicación do Convenio no Boletín Oficial da Provincia de Lugo ou Diario Oficial de Galicia a contía de 0,17 euros/quilómetro.

CAPÍTULO VII. CADROS DE PERSOAL, ASCENSOS E CESES

ARTIGO 18. CADROS DE PERSOAL. As Empresas reguladas por este Convenio axustarán os seus cadros de persoal ás seguintes normas:

a) Os empregados ou empregadas que teñan directamente baixo a súa responsabilidade a quince ou máis traballadores e traballadoras dos grupos titulados administrativos ou técnicos, clasificaranse como Xefes ou Xefas Superiores.

b) En dependencias con dez ou máis traballadores dos grupos nomeados no apartado anterior, o empregado ou empregada que se atope á fronte dos mesmos terá a categoría de Xefe ou Xefa de Primeira.

c) Nos centros de traballo onde presten os seus servicios un número de sete traballadores e traballadoras dos grupos xa nomeados anteriormente ou, no suposto de que sendo menos de sete exista un mínimo de tres clasificados como Oficial ou asimilado, estará á fronte dos mesmos un Xefe ou Xefa de Segunda.

ARTIGO 19. ASCENSOS.

Oficiais.- Tódalas empresas reguladas polo presente convenio están obrigadas a dispoñer nos seus cadros de persoal como mínimo dun número de oficiais de primeira igual ó vinte por cento do total de oficiais.

A elección dos novos oficiais de primeira é facultade exclusiva do empresario. Para o seu cómputo, terase en conta a fracción decimal que supere o 0,50.

Auxiliares Administrativos.- Os auxiliares administrativos con catro anos de servicio nesta categoría dentro da empresa pasarán automaticamente á categoría de oficial de segunda administrativo.

Ordenanza.- O ordenanza, ós catro anos de servicio na empresa pasará automáticamente á categoría de conserxe, e ós nove anos, á de conserxe maior.

Auxiliar Especialista de Oficina.- O auxiliar especialista de oficina con mais de tres anos na súa categoría dentro da empresa, ascenderá automaticamente á categoría de calcador.

Cobradores.- Os cobradores ó cumprir dez anos de antigüidade na súa categoría dentro da empresa, asimilaranse  exclusivamente a efectos económicos  ós oficiais de segunda administrativos.

Aspirantes.- Os aspirantes con dous anos de servicio nesta categoría dentro da empresa pasarán automáticamente á categoría, ben de auxiliar especialista de oficina, ben de auxiliar administrativo.

ARTIGO 20.- PREAVISO PARA O CESE.- O traballador ou traballadora que desexe cesar voluntariamente no servicio á empresa virá obrigado a poñelo en coñecemento do empresario por escrito cumprindo un prazo de preaviso dun mes para traballadores e traballadoras ca categoría de licenciados e diplomados universitarios e de quince días para o resto dos traballadores e traballadoras.

O incumprimento por parte do traballador ou traballadora da obriga de preavisar coa indicada antelación dará dereito ó empresario a descontar da liquidación de salarios o importe do salario, incluído o rateo das pagas extraordinarias, dun día por cada día de retraso no preaviso.

CAPÍTULO VII. ACCIÓN SINDICAL.

ARTIGO 21. DEREITOS SINDICAIS. En todo o concernente ós aspectos sindicais dentro e fóra das empresas, estarase ó que sobre esta materia dispón o vixente Estatuto dos Traballadores e a Ley Orgánica 11/1985, do 2 de agosto de Libertade Sindical.

CAPÍTULO IX. CONTRATACIÓN

ARTIGO 22. CONTRATACIÓN EVENTUAL. No uso da posibilidade prevista no Artigo 15.1.b do Estatuto dos Traballadores, modificado por Real Decreto-Ley 8/1997, no ámbito de aplicación do presente Convenio poderanse concerta-los contratos eventuais previstos en tal artigo cunha duración máxima de doce meses dentro dun periodo de 18 meses. No caso de concertarse tales contratacións por prazo inferior a doce meses, poderán ser prorrogadas mediante acordo das partes sin que a duración total do contrato poida exceder do dito límite máximo.

CAPÍTULO X. CÓMPUTOS E VINCULACIÓN

ARTIGO 23. COMPENSACIÓN E ABSORCIÓN. As condicións pactadas neste convenio forman un todo orgánico e indivisible e, por tanto, absorverán e compensarán no seu conxunto as melloras de calquera tipo que viñeran anteriormente satisfacendo as empresas, ben sexa por imperativo legal, convenio colectivo, etc.

ARTIGO 24. VINCULACIÓN Á TOTALIDADE. Como se cita no artigo anterior, as condicións establecidas no presente convenio e pactadas polas partes deliberadoras do mesmo, forman un todo orgánico e indivisible. En consecuencia, non poderá pretenderse a aplicación dunha ou varias normas con esquecemento das restantes, senón que, a tódolos efectos, o presente convenio aplicarase e observarase na súa totalidade.

No suposto de que a Autoridade Laboral ou Xurisdicción competente, no exercicio das súas facultades, declarase nulo total ou parcialmente algún artigo, quedará o presente convenio invalidado na súa totalidade, levándose a cabo unha nova negociación.